【抱膝思量】《之二十二：圖與文》

我有怪癖，對文字情有獨鍾，睇書同雜誌，滑網上文章，都會先讀文字，然後返轉頭看圖片開視頻。人家振振有詞 a picture paints a thousand words，是耶非耶，信不信由你。麵包樂隊就唔係幾信，Then why can’t I paint you？The words will never show，the you I’ve come to know。我呢，鍾意收藏卡片，簡潔俐落的賀詞，到時到候一番心意寄出去。行畫廊博物館專揀畫作明信片，收收埋埋喺本相簿度，得閒揭兩揭。摯友喜歡 Modigliani 我又抽出嚟貼郵票。阿女索性將 Turner 用繩串連掛牆欣賞。

珍納太太係上一代人，記住親友生日，結婚周年紀念，仲有聖誕新年，一定有賀卡到，親筆書寫。幾年前阿仔送佢 iPad 做生日禮物，就開始傳網卡，動畫配古典音樂，加一段自己心水賀文。農曆新年我睇住啲蓮花逐朶逐朶開，背景配洋人作曲家原創中樂，片尾珍納太太不忘留言 Kung Hei Fat Choy，都好窩心。

大家唔親筆寫信寄實體卡了。鍵盤短訊即傳，咪唔使望到頸都長囉。執筆忘字有 emojis 活現圖文並茂嘅效果。不過真係閉翳，收到嗰啲動畫留言唔停咁彈上彈落，眼花撩亂，頭痛之外我嗰隻壞眼弱弱地想抗議又唔好意思出聲。